इलाम नगरपालिका २, सुम्बेकस्थित महाकालेश्वर शिव मन्दिर तथा परोपकार संस्थामा आयोजना गरिएको श्रीमद्भागवत सप्ताह महापुराणमा २२ लाख रुपैयाँभन्दा बढी सहयोग संकलन भएको छ ।

महापुराण आयोजक समितिका आर्थिक संयोजक तथा निवर्तमान वडाध्यक्ष नारद लम्सालले भक्तजन र सहयोगी दाताबाट यो सहयोग संकलन भएको जानकारी दिए । आयोजक समिति अध्यक्ष कोषराज लम्सालको अध्यक्षतामा तथा वडा २ अध्यक्ष गिरिराज रिजालको प्रमुख आतिथ्यमा महापुराण सम्पन्न गरियो । जिल्ला समन्वय समिति सदस्य शेरबहादुर खालिङ, वडा सदस्यहरू मीना दाहाल गड्तौला, राजेन देवान, सरिता दियालीलगायतको सहभागितामा यज्ञ होमादीसहित महापुराण समापन गरिएको हो ।

त्यस अवसरमा शिव मन्दिर तथा परोपकार संस्थालाई नगद तथा जिन्सी सहयोग गर्ने व्यक्ति र संस्थालाई सम्मानपत्र प्रदान गरियो । गुरुहरू कृष्णप्रसाद घिमिरे, विष्णुप्रसाद भट्टराई, नारायण नेपाललगायत विभिन्न पण्डित–पुरोहितले वेद, रुद्री, चण्डी, गीतालगायत पाठसहित होमादी गरेका छन् ।जातीय, धार्मिक र सांस्कृतिक सद्भाव कायम गर्ने उद्देश्यले आयोजित समारोहमा सबै समुदायको उत्तिकै सहभागिता रहेको आयोजक समितिले जनाएको छ । साथै, टाढा–टाढाबाट धर्मानुरागीको बाक्लो उपस्थिति थियो ।