बिर्तामोड साना शहरी खानेपानी तथा सरसफाई उपभोक्ता संस्थाको आज २१ औं वार्षिक साधारणसभा सम्पन्न भएको छ ।

संस्थाका अध्यक्ष मेघराज बास्तोलाको अध्यक्षतामा भएको कार्यक्रममा राष्ट्रिय सभा सदस्य गोपालकुमार बस्नेतको प्रमुख आतिथ्य रहेको थियो । स्वागत संस्थाका उपाध्यक्ष शैलेन्द्र सिटौलालले गरेको कार्यक्रमको सञ्चालन सचिव पारसमणि मैनालीले गरेका थिए ।

संस्थाका अध्यक्ष बास्तोलले बार्षिक प्रतिवेदन प्रस्तुत गर्दै समस्या तथा सुनौतीहरु, भावी योजनाहरु प्रस्तुत गरेको थिए । अध्यक्षको प्रतिवेदन अनुसार हाल तीन वटा ओभरहेड टुयांकी, १५ वटा डिप बोरिङ, १० वटा फिल्टर प्लान्ट र नौ हजार उपभोक्ताहरु छन् । लामो समयदेखि जडान भएका डिप बोरिङबाट समस्या आउन सक्ने सम्भावनालाई मध्यनजर गर्दै संस्थाले यसै आर्थिक बर्षको पौषसम्ममा श्री टेकबहादुर बसपार्कमा एक थान, संस्थाले २ नम्बर ट्यांकी छेउमा खरिद गरी एक थान र ३ नम्बर ट्याङ्की छेउ मेहरमान स्मृति प्रतिष्ठानले निःशुल्क उपलब्ध गराएको जग्गामा एक थान डिप बोरिङ जडान गरिसकेको र यसै बर्ष थप दुई वटा बोरिङ जडान गरिने अध्यक्ष बास्तोलाले बताए ।

उनका अनुसार संस्थाको कार्यक्षेत्र भित्रका अति आवश्यक स्थानमा उपभोक्ताको माग अनुसार पाइपलाइन बिस्तार, उपयुक्त कार्यालय भवन निर्माण, ४ वटा स्कीमबाट १० वटा समर्सिवल पम्पले दैनिक १ करोड ९३ लाख लिटर पानी उत्पादन गरी २४ सै घण्टा पानी उपलब्ध गराइएको छ । त्यस्तै पानी शुद्धिकरणका लागि २ वटा फिल्टर मिडियो जडान, सुरक्षाका लागि वाल कम्पाउण्ड ग्रील निर्माण, कार्यसमिति र कर्मचारीको क्षमता अभिबृद्धिका लागि अभिमूखिकरण लगायतका कार्यक्रम सञ्चालन गरिएको अध्यक्षको प्रतिवेदनमा उल्लेख छ ।

कोषाध्यक्ष शारदा रिजालले प्रस्तुत गरेको आर्थिक प्रतिवेदन अनुसार गत आर्थिक बर्षमा आम्दानी ७ करोड ६३ लाख ७ हजार २४१ रुपैयाँ ८९ पैसा र खर्च ४ करोड ३४ लाख ५९ हजार ४९९ रुपैयाँ भई ३ करोड २८ लाख ४७ हजार ७४२ रुपैयाँ २८ पैसा बचत रहेको छ । यस आवको शुरुमै बैंक तथा नगद गरी १ करोड ६३ लाख ९८ हजार ७७२ रुपैयाँ ५३ पैसा भएको कोषाध्यक्ष रिजालद्धारा प्रस्तुत प्रतिवेदनमा उल्लेख छ ।

सोही कार्यक्रमकाबिच जेष्ठ उत्कृष्ट उपभोक्ताको रुपमा चन्द्रबहादुर खड्का र कान्तीदेवी शाहलाई सम्मान गरिएको छ भने उत्कृष्ट कर्मचारीका रुपमा प्लम्बर प्रकाश शिवा दर्जीलाई सम्मान गरिएको छ ।