नेपालले ताजिकिस्तानमा भएको मैत्रीपूर्ण फुटबलमा शनिबार अफगानिस्तानमाथि २–० को जित निकालेको छ। ताजिकिस्तानको राजधानी डुसान्बेमा भएको दोस्रो मैत्रीपूर्ण खेलमा नेपालले सन् २०१३ को साफ च्याम्पियन अफगानिस्तानमाथि जित निकालेको हो। गत बुधबार नै घरेलु टोलीसँग ४–० को फराकिलो हारपछि दोस्रो मैत्रीपूर्ण खेलमा भने नेपाल जित प्राप्त गर्न सफल भयो। नेपालको जितमा जिलेस्पीजंग कार्की र रोहित चन्दले गोल गरे। यससँगै नेपालले अफगानिस्तानमाथि १३ वर्षपछि जित रच्यो। नेपालले पछिल्लोपल्ट सन् २०११ मा अफगानिस्तानलाई १–० ले हराएको थियो ।

घरेलु मैदानमा भएको एएफसी च्यालेन्ज कपको क्वालिफायरमा भरत खवासको गोलमा नेपालले अफगानिस्तानमाथि जित दर्ता गरेको हो । त्यस पछिका दुई भेटमा भने नेपाल अफगानिस्तानसँग पराजित हुन पुग्यो। नेपालले पछिल्लो दुई फिफा विन्डोमा खेल्न नपाएपछि यसपटक भने खेल्न पाएको थियो । अब नेपाली टोलीले सन् २०२५ को मार्चमा एशियन कप छनोटको तेस्रो चरण खेल्नेछ ।