चारआली, २४ चैत— धार्मिक एवं सामाजिक सेवा कार्यमा सक्रिय छठ समाज सेवा समिति बिर्तामोडले यस वर्षको रामनवमीको अवसरमा विशेष भण्डारा कार्यक्रम आयोजना गरेको छ ।

समितिले चारआली स्थित पावन धार्मिक स्थल पाउपाथिभरामा श्रद्धालु भक्तजनलाई निःशुल्क भोजन वितरण गर्ने  उदेश्यले भण्डाराको आयोजना गरिएको छठ समाज सेवा समितिका अध्यक्ष रामेश्वर दुवेदीले जानकारी दिनुभयो ।

रामनवमी हिन्दू धर्मालम्बीहरूको महत्वपूर्ण पर्व हो, जसलाई भगवान रामको जन्मोत्सवको रूपमा मनाइन्छ ।

यो अवसरमा देशभरका मन्दिरहरूमा विशेष पूजा–आराधना, झाँकी, शोभायात्रा र भजनकीर्तन गरिन्छ। यस्तै अवसरमा श्रद्धालुहरूको सेवामा समर्पित रहँदै छठ समाज सेवा समितिले ‘भक्ति र सेवा’लाई मूल मन्त्र बनाउँदै भण्डाराको आयोजना गरेको जनाएको छ।

समितिका अध्यक्ष दुवेदीले भन्नुभयो, “धार्मिक पर्वहरू केवल पूजाअर्चनाको माध्यम मात्र होइनन्, सामाजिक एकता, सद्भाव र सेवा भावको अनुपम अवसर पनि हुन्। भण्डारा कार्यक्रममार्फत हामीले भक्तजनलाई सेवा गर्ने, परोपकारको भावना अभिवृद्धि गर्ने र सामूहिक सहभागितालाई प्रोत्साहन गर्ने उद्देश्य राखेका छौं।”

पाउपाथिभरामा आयोजित यस भण्डारामा  हजारबढी श्रद्धालुहरू सहभागी भएका  थिए । आयोजकहरूका अनुसार, भण्डारामा शुद्ध, सात्त्विक भोजन – खिचडी, तरकारी, अचार तथा मिष्ठान्नको व्यवस्था गरिएको  थियो ।

श्रद्धालुहरूको सेवा गर्न, परोपकारी भावना विकास गर्न, धार्मिक मूल्यमान्यता प्रति सम्मान व्यक्त गर्न र समाजमा सकारात्मक सन्देश प्रवाह गर्न  भण्डाराको आयोजना गरिएको छठ समाज सेवा समितिका  बरिष्ठ उपाध्यक्ष संगिता रौनियारले बताउनु भयो ।

विशेषतः भीडभाड हुने पर्वका दिनहरूमा यस्तो आयोजनाले भक्तजनलाई सहजता मिल्ने र थकित शरीरलाई आराम दिने अवसर प्रदान गर्छ। छठ समाज सेवा समितिको यो पहलले धार्मिक तथा सामाजिक समन्वयलाई थप सुदृढ बनाउने विश्वास गरिएको छ।

समितिले आगामी दिनमा पनि यस्तै सेवा र सामाजिक हितमा केन्द्रित कार्यक्रम निरन्तर सञ्चालन गर्ने जनाएको छ ।

छठ समाज सेवा समितिले  माथिल्लो पाथिभरामा गएको ९ दिनदेखी भक्तजनहरुको सेवाका निम्ति भण्डारा कार्यक्रम सञ्चालन गरिरहेको छ ।

भण्डारा कार्यक्रममा छठ समाज सेवा समितिका युवा फ्रन्ड सल्लाहकार उज्वलकुमार शाह लगायत कार्यसमिति पदाधिकारीहरुको उपस्थिती रहेको थियो ।