बिर्तामोड। झापाको अर्जुनधारा १ साधुटारमा रहेको श्री शंकराचार्य पीठ वेदवेदाङ्ग संस्कृत पाठसालामा लागेको सर्वकल्याण अभिषेकात्मक अतिरुद्र महायज्ञको आयव्यय सार्वजनिक गरिएको छ।

  संस्थाका बरिष्ठ उपाध्यक्ष पंडित शान्तीराम नेपालको अध्यक्षता तथा  पूर्व संस्थापक तथा संरक्षक पंडित केदारनाथ खतिवडाको प्रमुख आतिथ्यमा सम्पन्न कार्यक्रममा उपाध्यक्ष मदनकुमार ढकालले स्वागत मन्तव्य व्यक्त गरेका थिए।

संस्थाको ४९ औं बार्षिकोत्सवको अवसरमा गत माघ १ गतेदेखि ११ गतेसम्म सञ्चालन गरिएको सर्वकल्याण अभिषेकात्मक अतिरुद्र महायागमा आयतर्फ एक करोड ५२ लाख एक सय ३३ रुपैयाँ र व्ययतर्फ एक करोड ५ लाख १३ हजार ९  सय ३० रुपैयाँ र बचततर्फ ४६ लाख ८६ हजार दुई सय तीन रुपैयाँ रहेको महासचिव  पंडित हरिप्रसाद नेपालले जानकारी दिए।
उनले केही दाताहरूले अझै रकम दान गर्नेक्रम रहेकाले बचत रकम बढ्ने  बताए।
महायागको आन्तरिक व्यवस्थापन सदस्य चन्द्र प्रसाईंले महायाग सफलतापूर्वक सम्पन्न गरेको बताए।
संस्थाका बरिष्ठ उपाध्यक्ष पंडित शान्तीराम नेपालले कोशी प्रदेशमै पहिलो पटक सर्वकल्याण अभिषेकात्मक अतिरुद्र महायाग आयोजना गरिएको बताउँदै यसलाई सफल बनाउन सहयोग गर्ने सबैलाई धन्यवाद दिए।
कार्यक्रमको सञ्चालन महासचिव पंडित हरिप्रसाद नेपालले गरेका थिए।