समाजवादी मोर्चाले शुक्रबार भृकुटीमण्डप र राजावादीहरूले तीनकुनेमा प्रदर्शन गर्ने तयारी गरेका छन्। राजसंस्था फर्काउन राजनीति गर्दै आएको राष्ट्रिय प्रजातन्त्र पार्टीले शुक्रबार आन्दोलन गर्दै छ। त्यसको नेतृत्व राप्रपाकै नेता दुर्गा प्रसाईंले गर्दै छन्। राजसंस्था पुनर्स्थापनाका लागि संयुक्त जनआन्दोलन समितिको कमाण्डरको जिम्मेवारी प्रसाईंलाई दिएको हो।

जनआन्दोलन समितिले बिहीबार पत्रकार सम्मेलन गर्दै संवैधानिक राजसंस्थाको पुनस्र्थापना र सँगसँगै सनातन हिन्दू अधिराज्यको पुनस्र्थापना, संघीयता खारेजी र भ्रष्टाचार नियन्त्रण र सुशासनका लागि निरन्तर आन्दोलन गर्ने जनाएको हो। चैत १५ गते काठमाडौंमा प्रदर्शन गरेपछि चैत्र १७ गतदेखि आन्दोलनका थप कार्यक्रमलाई अघि बढाइने संयुक्त जनआन्दोलन समितिका संयोजक नवराज सुवेदीले जानकारी दिए।

उनले २०४७ को संविधानलाई आधार मानेर ७२ को संविधानका सकारात्मक प्रावधानलाई समेट्दै प्रमुख राजनीतिक पक्षहरूबीच सहमतिको बाटो बनोस भन्ने चाहना रहेको बताए।

यसबाट संविधान र व्यवस्था दुवैमा संरचनागत पुनरावलोकन गर्न सकिने उनको भनाइ छ। संयोजक सुवेदीले हिजो गणतन्त्र खोजेका जनताले अहिले पुन राजसंस्था खोजेको उल्लेख गर्दै राजनीतिभन्दा माथिको अभिभावकीय भूमिकामा संवैधानिक राजसंस्था आवश्यक रहेको धारणा बताए।

यसअछि चैत ४ गते राष्ट्रिय पञ्चायतका पूर्व अध्यक्ष राप्रपाका नेता नवराज सुवेदीको नेतृत्वमा राजसंस्था पुनस्र्थापनाका लागि संयुक्त जनआन्दोलन समिति गठन गरेको थियो। यद्यपि उक्त समितिको विरोध भने राप्रपाकै अध्यक्ष राजेन्द्र प्रसाद लिंङदेनले गरेका थिए।

यद्यपि बिहीबार दुर्गा प्रसाईंको नेतृत्व सिँगो राप्रपाले सुवेदीको नेतृत्व स्विकारेको छ। राप्रपाका प्रवक्ता मोहनकुमार श्रेष्ठले आन्दोलनमा सक्रिय सहभागिताका लागि कार्यकर्ता पंक्तिलाई आह्वान गरिसकेका छन्। श्रेष्ठले राप्रपा समान विचार र उद्देश्य भएका सबैसँग सहकार्य, कार्यगत एकता र मोर्चा बनाएर आन्दोलनको मोर्चामा उभिन प्रतिबद्ध रहेको बताए। शुक्रबारको सभा भने तिनकुनेमा गर्न प्रशासनले अनुमति दिएको छ।

राप्रपाले राजसंस्था र हिन्दू राष्ट्र स्थापनाका लागि चैत्र २६ गते उपत्यकामा सभा गर्ने र वैशाख ७ गतेबाट काठमाडौंं केन्द्रित आन्दोलन गर्ने घोषणा गरिसकेको छ।