काठमाडौं,  विश्वव्यापी भूटानी संगठन (जी.बी.ओ.) नेपालको औपचारिक उद्घाटन कार्यक्रम आज काठमाडौंको अनामनगरमा भव्य रूपमा सम्पन्न भएको छ। यो ऐतिहासिक कार्यक्रम GBO नेपालकी अध्यक्ष  शिला उप्रेतीको नेतृत्वमा सम्पन्न भएको हो। प्रमुख अतिथिका रूपमा नेपाल प्रतिनिधि सभाका उपसभामुख माननीय इन्दिरा राना मगरको उपस्थिति रहेको थियो।

जी.बी.ओ. नेपालको उद्घाटन समारोहमा विभिन्न विशिष्ट व्यक्तित्वहरूको उपस्थिति रहेको थियो। कार्यक्रमलाई विशेष बनाउन नेपाली हास्य कलाकार तथा अभिनेता श्री मनोज गजुरेल, नेपाली फिल्म उद्योगका  अभिनेता तथा निर्माता श्री सिमान्त उदास, अभिनेता अनुभव रेग्मी, बेलडाँगी भूटानी शरणार्थी शिविरका सचिव श्री सञ्चा हाङ सुब्बा, पथरी भूटानी शरणार्थी शिविरका सचिव श्री कर्णवीर राई लगायत जी.बी.ओ. का अन्य सम्मानित सदस्यहरू उपस्थित रहेका थिए।

कार्यक्रमको उद्घाटन समारोहमा प्रमुख अतिथि माननीय इन्दिरा राना मगरले जी.बी.ओ. नेपालको औपचारिक घोषणा गर्दै शुभकामना व्यक्त गरिन्।

उनले जी.बी.ओ. नेपालले शरणार्थी समुदायको हकहितका लागि महत्त्वपूर्ण भूमिका खेल्ने विश्वास व्यक्त गरिन्। साथै, उनले भूटानी नेपाली समुदायको पहिचान, अधिकार र समृद्धिको यात्रामा जी.बी.ओ. नेपाल जस्तो संस्थाले महत्त्वपूर्ण योगदान पुर्‍याउने बताइन्।

कार्यक्रमका क्रममा प्रमुख अतिथिहरूले भूटानी नेपाली समुदायको वर्तमान अवस्था, नेपाल र अन्तर्राष्ट्रिय स्तरमा उनीहरूको पहिचान, अधिकार र भविष्यबारे चर्चा गरे। हास्य कलाकार तथा अभिनेता मनोज गजुरेलले आफ्नो सम्बोधनमा नेपाली भाषा, संस्कृति र पहिचानको प्रवर्द्धनमा ध्यान दिनुपर्ने आवश्यकता औंल्याए।

नेपाली फिल्म उद्योगका अभिनेता तथा निर्माता सिमान्त उदास र अनुभव रेग्मीले पनि कार्यक्रमलाई सम्बोधन गर्दै कला, संस्कृति र चलचित्रका माध्यमबाट शरणार्थी समुदायको कथा विश्वसामु पुर्‍याउने प्रयास गर्ने प्रतिबद्धता व्यक्त गरे।

बेलडाँगी र पथरी भूटानी शरणार्थी शिविरका सचिवहरू सञ्चा हाङ सुब्बा र कर्णवीर राईले शरणार्थी समुदायका चुनौती, नेपालमा रहेका भूटानी शरणार्थीहरूको वर्तमान अवस्था र उनीहरूको अधिकार संरक्षणका विषयमा बोले।

उनीहरूले जी.बी.ओ. नेपाल जस्तो संस्थाले शरणार्थीहरूको हितमा काम गर्नुपर्ने आवश्यकता औंल्याए।

GBO नेपालले यो सफल उद्घाटन कार्यक्रमका लागि सबै सहभागी, आयोजक समिति, सल्लाहकार टोली र सम्पूर्ण समुदायलाई हार्दिक आभार प्रकट गरेको छ। यस उद्घाटन समारोहले जी.बी.ओ. नेपालको भावी योजनाहरूलाई थप बल प्रदान गर्ने विश्वास व्यक्त गरिएको छ।

जी.बी.ओ. नेपालले नेपाली भूटानी समुदायको सशक्तीकरण, पहिचान र अधिकार संरक्षणका लागि निरन्तर प्रयास गर्ने प्रतिबद्धता जनाएको छ। यस संस्थाले नेपालमा रहेका भूटानी शरणार्थीहरूसँगै विश्वभर छरिएर रहेका भूटानी नेपालीहरूलाई एकजुट गर्दै उनीहरूको हितका लागि कार्य गर्ने लक्ष्य राखेको छ।

यस उद्घाटन समारोहले जी.बी.ओ. नेपालका भावी कार्यक्रमहरू र गतिविधिहरूका लागि नयाँ ऊर्जा प्रदान गरेको छ। जी.बी.ओ. नेपालले भविष्यमा शिक्षा, सामाजिक सेवा, मानव अधिकार प्रवर्द्धन र सांस्कृतिक संरक्षणका क्षेत्रमा विशेष कार्यक्रम सञ्चालन गर्ने योजनासमेत अघि सारेको छ।

कार्यक्रमको समापन गर्दै जी.बी.ओ. नेपालकी अध्यक्ष श्रीमती शिला उप्रेतीले सबै सहभागीलाई धन्यवाद दिँदै संगठनको उद्देश्य, महत्व र भावी योजनाबारे जानकारी गराइन्।जी.बी.ओ. नेपाललाई सफल बनाउन सबै पक्षको सहकार्य आवश्यक रहेको उल्लेख गरिन्।

यस भव्य उद्घाटन समारोहले जी.बी.ओ. नेपाललाई औपचारिक रूपमा नेपाली समाजमा स्थापित गर्दै शरणार्थी समुदायको हितका लागि काम गर्न प्रेरित गरेको छ।