काठमाण्डाै – प्रधानमन्त्री केपी शर्मा ओलीले पूर्वराजदूत तथा वरिष्ठ पत्रकार कमल कोइरालाप्रति श्रद्धाञ्जली अर्पण गर्नुभएको छ ।

प्रधानमन्त्री ओलीले आज आलोकनगरमा रहेको नेकपा (एकीकृत समाजवादी) को पार्टी कार्यालयमा पुगेर कोइरालाप्रति श्रद्धाञ्जली अर्पण गर्नुभएको हो । नेकपा (एकीकृत समाजवादी) को पार्टी केन्द्रीय कार्यालयमा कोइरालाको पार्थिव शरीर अन्तिम श्रद्धाञ्जलीका लागि राखिएको थियो ।

नेकपा (एकीकृत समाजवादी) को पोलिटब्युरो सदस्य रहनुभएका कोइरालाको ८७ वर्षको उमेरमा गएराति निधन भएको थियो । उहाँको आजै पशुपति आर्यघाटमा अन्त्येष्टि गरिएको छ ।

पत्रकार, लेखक तथा कूटनीतिज्ञसमेत रहनुभएका कोइरालाको पक्षघात भएपछि उपचारका क्रममा अस्पताल निधन भएको थियो ।