चितवन – चितवन राष्ट्रिय निकुञ्ज घुम्ने पर्यटकको सङ्ख्यामा कमी आएको छ । गएकाे आर्थिक वर्षको तुलनामा यस वर्षको चैतसम्ममा पर्यटकको सङ्ख्यामा कमी आएको हो ।

गएकाे आर्थिक वर्षमा अहिलेसम्मकै सबैभन्दा बढी पर्यटकले निकुञ्ज घुमेका थिए । निकुञ्जका सूचना अधिकारी अविनास थापामगरका अनुसार यस वर्षको चैतसम्ममा एक लाख ८२ हजार दुई सय २७ जना पर्यटकले निकुञ्ज घुमेका छन् । गएकाे आर्थिक वर्षमा दुई लाख ५० हजार तीन सय ३७ जनाले निकुञ्ज घुमेका थिए ।

चालू आर्थिक वर्षको चैतसम्म नेपाली ९२ हजार आठ सय ९०, सार्कका १६ हजार सात सय ९८ र तेस्रो देशका ७२ हजार पाँच सय ३९ जना पर्यटकले निकुञ्ज घुमेका छन् । गएकाे आर्थिक वर्षको तुलनामा यस वर्ष आन्तरिक पर्यटकको सङ्ख्यामा ठूलो गिरावट आएको तथ्याङ्कले देखाएको छ ।

निकुञ्जका प्रमुख संरक्षण अधिकृत डा. गणेश पन्तले निकुञ्ज भ्रमण गर्ने पर्यटकको सङ्ख्या र सफारी गर्ने जीप सङ्ख्यामा कमी आउँदा राजस्वसमेत घटेको बताउनुभयो ।

यद्यपि निकुञ्जमा भीडभाड नभएको वन्यजन्तुका लागि राम्रो हुने उहाँको भनाइ छ ।

गएकाे आर्थिक वर्षमा यो अवधिमा २८ करोड २६ लाख राजस्व सङ्कलन भएकामा यस वर्ष २३ करोड ६४ लाख ९९ हजार रुपैयाँमात्र राजस्व सङ्कलन भएको छ ।

चितवन राष्ट्रिय निकुञ्ज मध्यवर्ती क्षेत्र व्यवस्थापन समितिका अध्यक्ष प्रकाश ढुङ्गानाले कोभिड–१९ पछि मानिसमा क्रयशक्ति कमजाेर बन्नु र कोभिडपछि उकुसमुकुस भएका धेरै पर्यटक गएकाे वर्ष निकुञ्ज घुमेकाले यस वर्ष सङ्ख्या घटेको हुनसक्ने अनुमान गर्नुभयो । उहाँले भन्नुभयो, ‘जुनसुकै क्षेत्रमा पनि उच्च तहमा पुगेपछि क्रमशः घट्दै जान्छ ।’

निकुञ्जभित्रको घाँसे मैदान व्यवस्थापन समयमा हुन नसक्दा दुर्लभ वन्यजन्तु हेर्न नपाएकाले पनि केही हदसम्म पर्यटक घटेको हुनसक्ने उहाँको भनाइ छ ।

क्षेत्रीय होटल सङ्घ सौराहाका उपाध्यक्ष गुणराज थपलिया मुख्य रूपमा बाटोको कारण पर्यटक आगमनमा कमी आएको बताउनुहुन्छ । उहाँले भन्नुभयो, ‘सडक र आकाशबाट आउनै कठिन छ ।

कसरी पर्यटक आउँछन् ?’ चितवनबाट भैरहवा, काठमाण्डाै र पोखरा तीनैतर्फको सडकको स्तरोन्नति हुँदै गरेकाले सहज नहुँदा पर्यटक नआएका उहाँ बताउनुहुन्छ । जहाजबाट आउँदा समयमा उडान नहुने र भाडा महँगाे भएको थपलियाको भनाइ छ ।